Жарма ауданында мектеп архивтерін жүргізу бойынша тәжірибелік семинар өтті

2026 жылғы 19 маусымда Абай облысы мемлекеттік архивінің Жарма филиалы аудан мектептері директорларының оқу ісі жөніндегі орынбасарларына арналған оқыту семинарын өткізді.

Семинар тақырыбы: «Қазақстан Республикасы мектептеріндегі құжаттарды ғылыми-техникалық өңдеу және істер номенклатурасын құрастыру».

Шараның спикерлері мен негізгі сарапшылары ретінде Жарма филиалының архив мамандары Сахарина Жамал Нұртуғанқызы мен Тәжиева Әсел Сәкенқызы сөз сөйледі.

Семинар барысында мектеп жетекшілеріне іс қағаздарын сауатты жүргізудің басты талаптары түсіндірілді:

Істер номенклатурасы: Мектептерде жаңа оқу жылына арналған бұл құжат міндетті түрде әзірленіп, бұйрықпен бекітілуі тиіс.

Сақтау мерзімдері:Негізгі қызметтік бұйрықтар — тұрақты; қызметкерлердің жеке істері — 75 жыл; алфавиттік кітаптар — 50 жыл; журналдар мен табельдер — 5 жыл; ал түлектердің істері 3 жыл сақталады.

ҒТӨ ережелері: Мамандар парақтарды нөмірлеу, құжаттарды металл қыстырғыштардан тазарту және істерді 4 жерден тесіп, қатты мұқабаға түптеу тәртібін іс жүзінде көрсетті (бір томда 180 парақтан аспауы тиіс).

Құжаттарды жою:*Мерзімі өткен құжаттар тек Сараптау комиссиясының (СК) арнайы актісі бекітілгеннен кейін ғана жойылады. Тұрақты құжаттарды мерзімінен бұрын жоюға тыйым салынады.

Цифрландыру және сақтау:Электрондық құжат айналымы, ЭЦҚ қолдану, сонымен қатар архивтегі климаттық режимді (+17...+19°C) және өрт қауіпсіздігін сақтау мәселелері талқыланды.

Шара соңында архившілер жиі кездесетін қателіктерді талдап, қатысушылардың сұрақтарына жауап берді. Өткізілген бұл семинар мектептердегі ведомстволық архивтердің  қалыптасуына көмектеседі!